தமிழ் தேசிய விடுதலை அரசியலுக்கான இயங்கு புள்ளிகள்

குறிப்பு: மூன்று ஆண்டுகளுக்கு முன்பாக, தமிழில் அரசியல் – கோட்பாட்டு இதழ் ஒன்றைத் தொடங்க வேண்டும் என்று நண்பர்களோடு இணைந்து முயற்சி எடுத்தபோது, அதற்கான கருத்தியல் தேவைகளாகக் கருதி முன்மொழிந்தது. முயற்சி கனியவில்லை. என்றாகிலும் கனியும் என்ற நம்பிக்கை உண்டு.

தற்காலத்தைய அரசியல் சூழலில், கவனத்தில் கொள்ள வேண்டிய புள்ளிகள் என்பதன் பொருட்டு பகிர்கிறேன்.

——————–

90 களின் இறுதியில் தமிழ் அறிவுச் சூழலில் தேங்கிவிட்ட அறிவார்த்த மரபைப் புத்துருவாக்கம் செய்ய வேண்டிய பணி ஒரு சவாலாகவே இன்று எழுந்து நிற்கின்றது.

மா – லெ இயக்கங்களின் கோட்பாட்டு ரீதியிலான மற்றும் நடைமுறை அளவிலான தோல்வி, பல்வேறு தேசிய இனப் போராட்டங்களையும் செறித்து வலுவானதொரு மய்ய இந்தியத் தேசிய அரசை நிறுவியதில் பார்ப்பன சக்திகளின் வெற்றி, பெரியாரின் தீவிர இயக்கத்தின் கிளையாக எழுந்து அதிகாரத்தைக் கைப்பற்றிய கட்சிகளின் சமரசங்கள், சமூக மற்றும் அரசக் கட்டமைப்பின் படிநிலைகளில் இடைப்பட்ட சாதிகளின் முன்னேற்றங்கள், இதன் எதிர்வினையாக எழுந்த மிகப்பிற்படுத்தப்பட்ட, தாழ்த்தப்பட்ட  சாதியினரின், சிறுபான்மையினரின் வலுவான பிரதிநிதித்துவ அரசியல் – இவை 70 கள் தொடங்கி தமிழ் அரசியல் – சிவில் சமூக வெளியில் நிகழ்ந்த முக்கிய மாற்றங்கள்.

இப்போக்குகளுக்கு முகம்கொடுத்து ஆதிக்க சக்தியினரைத் தனிமைப்படுத்தி பிற அனைத்து பிரிவினரையும் ஒருங்கிணைக்கும் புள்ளிகளை அடையாளம் காணத் தவறியமையே வலுவான ஆரோக்கியமான தமிழ்த் தேசிய அடையாள உருவாக்கத்தின் தோல்விக்கான காரணம் எனலாம்.

80 களின் இறுதியில் உருப்பெற்ற அறிவார்த்த முயற்சிகள், மா – லெ இயக்கங்களின் தோல்வியின் மீதான விமர்சனத்திலும், ஒடுக்கப்பட்ட சாதிகளின் பிரதிநிதித்துவ அரசியலை தனித்துவமாக பிராதானப்படுத்தி, தேசிய உருவாக்கத்தின் அவசியத்தையே கேள்விக்குள்ளாக்கி, எதிர்மறைப் போக்கில் தஞ்சமடைந்து. இத்தகாப்சத்தின் இறுதியில் – குறிப்பாக, ஈழத்தில் நடந்தேறிய இனப்படுகொலையை ஒட்டி – தேங்கித் தடையாகி நிற்கிறது.

பன்னாட்டு அரசியல் சூழலைக் கணக்கில் கொள்வதானால், முதலாம் உலகப் போரின் முடிவில் ஹான்னா ஆரெண்ட் முன்வைத்த “அரசற்ற மக்களினங்கள்” (Stateless Peoples) என்ற நிலை, அன்றைய நிலையைக் காட்டிலும் வலுவடைந்த பன்னாட்டு அரசியல் சக்திகளின் ஆதிக்கத்தில் தேக்கமே கண்டிருக்கிறது. குறிப்பாக, மூன்றாம் உலக நாடுகளைப் பொருத்தவரையில், காலனிய அரசமைவுகளின் தொடர்ச்சியே இத்தேக்கத்திற்கான பிரதான தடைச் சக்தியாக இருக்கின்றது.

பருந்துப் பார்வையிலான இப்பின்னணியில் வைத்தே, இனியான அறிவார்த்த பணிகளின் சவால்கள் எதிர்கொள்ளப்பட வேண்டியிருக்கிறது.

அவற்றின் முக்கியப் புள்ளிகளாவன:

  1. பன்னாட்டு அரசியல் சக்திகளின் ராஜதந்திர நகர்வுகளில் ஒடுக்குண்டு கிடக்கும் தேசிய இன விடுதலைப் போராட்டங்களுக்கு இனி சாத்தியமான அரசியல் வழிகளைக் கருத்துருவாக்கம் செய்வது. அரசு இறையாண்மை குறித்த கருத்துருவாக்கங்கள் மற்றும் காலனிய அரசுத் தொடர்ச்சிகளை மறுவரைவு செய்வது.
  2. இதன் இணைவாக, தேசிய உருவாக்கம் என்பது அரச அதிகாரத்தைக் கைப்பற்றுதலில் நிறைவு பெறுகிறது எனில், அதற்கான வழிகள் இனியும் ஒரு நிலப்பரப்பிற்குள் அடங்கிவிடுமா அல்லது பன்னாட்டு அரசியலில் விரிவுபடுத்தப்பட வேண்டியிருக்குமா – அவ்வாறெனின் நகர்வுகள் எத்தகையவையாக இருக்கலாம் என்பவை குறித்தான பரிசீலனைகள்.
  3. பல்வேறு ஒடுக்கப்பட்ட பிரிவினரின் அடையாள அரசியலின் தேவைகள் – எல்லைகள், ஒரு தேசிய அடையாளத்திற்குள்ளாக அவை நிறைவேற்றப்படுதலுக்கான வழிவகைகளைப் பற்றிய பரிசீலனை.
  4. இதன் இணையாக, தேசிய உருவாக்கத்தின் முக்கியதொரு அங்கமான சிவில் சமூக உருவாக்கத்திற்கான செயல்பாடுகளை எங்ஙனம் மேற்கொள்வது என்ற கேள்வி. ஐரோப்பிய சமூகங்களின் அனுபவத்தின் பாடங்களில் இருந்தும், நமது சமூக அமைவின் தனித்துவங்களைக் கணக்கில் கொண்டும் பாதைகளை அடையாளம் காணுதல்.
  5. சிவில் சமூக உருவாக்கப் பணியின் முக்கிய அங்கமான பண்பாட்டுக் கட்டமைவுகளை – வரலாற்று ஆய்வுகள், நிகழ்கால போக்குகள் குறித்த ஆய்வுகள், கலை – இலக்கியப் படைப்பாக்கங்கள், இவற்றுக்கான  கட்டமைவுகளை உருவாக்குதல்.

இப்பொதுப் புள்ளிகளில் நின்று குறிப்பான புள்ளிகளை அடையாளம் கண்டு நகரலாம் என்பது முன்மொழிவு.

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: