சுத்த வீரன்

“இதைப் பற்றி எழுதும்போது நமது உடம்பு சிலிர்த்துக் கொண்டே இருக்கிறது. பார்ப்பனரல்லாத மக்கள் இவ்வீரனைக் கொண்டாட வேண்டும். ஒவ்வொரு ஊரிலும் கூட்டங்கள் போட்டு அவனைப் பாராட்டித் தீர்மானங்கள் செய்தனுப்ப வேண்டும். பார்ப்பனரல்லாதார் முன்னேற்றச் சம்பந்தமான ஒவ்வொரு சங்கத்திலும் இவ்வீரனின் உருவப் படத்தை வைக்க வேண்டும். உண்மையான பார்ப்பனரல்லாதார் ஒவ்வொருவர் வீட்டிலும் இப்படங்கள் துலங்க வேண்டும். ஒவ்வொரு வீட்டிலும் குழந்தைகளுக்கெல்லாம் இவ்வீரனின் சுத்த வீரத்தன்மையை எடுத்துச் சொல்ல வேண்டும்.”

 
பெரியார் மிகவும் உணர்ச்சிவயப்பட்டு எழுதிய அரிதான தலையங்கம் ஒன்றில் வரும் வரிகள் இவை. “பார்ப்பனக் கொடுமைக்காக உயிர்விட்ட சுத்த வீரன்” என்ற தலைப்பிட்டு, 17.04.1927 ”குடி அரசு” இதழில் எழுதப்பட்டத் தலையங்கம். காங்கிரசில் இருந்து விலகி, “குடி அரசு” இதழைத் தொடங்கி, சுயமரியாதை இயக்கப் பிரச்சாரத்தைத் தொடங்கியிருந்த இரண்டு ஆண்டுகளுக்குள்ளாக எழுதப்பட்டது. பெரியாரை இவ்வளவு உணர்ச்சிவயப்பட வைத்த சம்பவம்தான் என்ன?

 
அன்றைய செங்கல்பட்டு ஜில்லாவிற்கு உட்பட்ட பொன்னேரி கிராமத்தில், பார்ப்பன அதிகாரி ஒருவரின் கீழ் வேலை செய்துவந்த பி. சுப்பிரமணியம் என்ற 22 வயது இளைஞர், பார்ப்பன அதிகார துஷ்பிரயோகங்களைப் பொறுத்துக் கொள்ள இயலாமல், எதிர்ப்பு தெரிவிக்கும் வகையில் தனது உயிரை மாய்த்துக் கொண்டார். அந்த இளைஞர் எழுதி வைத்த கடிதத்தை பெரியார் தனது தலையங்கத்துடன் பிரசுரித்திருக்கிறார். விஷயத்தைப் புரிந்து கொள்ள அக்கடிதத்தின் முக்கியப் பகுதிகளை பார்க்கலாம்.

 

பொன்னேரி லோகல் போர்டு ஆஸ்பத்திரி,
1927.

 

அன்புமிக்க மாணிக்கம்!

 

இந்த மாதம் 8 – தேதி எனக்கு குறிப்பிடத்தக்க ஒரு அதிர்ஷ்டவசமான நாளாகும். அது என்னவென்றால் நான் இந்த உலகத்தையும், உன்னையும், எனது பந்துக்களையும் விட்டு சந்தோஷமாகவும், திருப்தியாகவும் பிரியும் நாளாகும்.

 
ஒரு பார்ப்பன எஜமானன் கீழ் இருந்து வேலை செய்ய இனி என்னால் முடியாது. பார்ப்பன எஜமானன் கீழ் வேலை செய்து ஜீவிப்பதைக் காட்டிலும், செத்துப்போவது மேலானதெனவும், புத்திசாலித்தமனான தெனவும் நான் தெரிந்து கொண்டேன்.

 
… இதுவரை டாக்டர் நாயர், சர். தியாகராய செட்டியார், எ. ராமசாமி முதலியார், சி. நடேச முதலியார் முதலியவர்கள் பார்ப்பனர் கொடுமைகளை அடியோடு துலைப்பதற்காக செய்து வரும் பிரயத்தனங்களைத் தப்பிதமென்று நினைத்திருந்தேன். ஆனால், இப்போது அத்தலைவர்கள் வார்த்தைகள் ஒவ்வொன்றும் சத்தியமானது என்பது என் விஷயத்தில் மிகவும் ருஜுவாகி விட்டது. பார்ப்பனர்களை வெறுப்பதாலாவது, பார்ப்பனர்களின் கீழ் வேலை செய்யக்கூடாது என்று நினைத்து என் வேலையை ராஜீனாமா செய்து விடுவதினாலாவது வேறு வழியில் இந்த நாட்டில் பிழைக்க முடியாதவனாயிருக்கிறபடியால் ஒரு கோப்பை பாலில் ஒரு அவுன்சு சியானிக் ஆசிடைக் (Hydro – Cyanic Acid) கலந்து சாப்பிட்டு உயிரை மாய்த்துக் கொள்வதையே விரும்புகிறேன். ஆதலால் நான் ஒரு உண்மையான பார்ப்பனரல்லாத உணர்ச்சி உடையவனாகவும் எனது பார்ப்பனரல்லாதார் சகோதர சகோதரிகள் பார்ப்பனக் கொடுமையிலிருந்து நீங்குவதற்காக அப்பார்ப்பனக் கொடுமையை அழிக்க வேண்டியும், நான் பிராணனை விடுகிறேன். நான் செய்யும் இந்தக்காரியம் சரிதானே? இந்த விஷயத்தை மெயில் பத்திரிகையிலும் ஜஸ்டிஸ் பத்திரிகையிலும் பிரசுரிக்கச் செய்வதால் நமது சகோதரிகளையும் சகோதரர்களையும் பார்ப்பன சூழ்ச்சியில் சிக்கி ஏமாறாமலிருப்பதற்காக இருந்து தப்புவிக்க உதவும் என நினைக்கிறேன்…. இதோடு நான் நல் விடைபெற்றுக் கொள்ளுகிறேன். இனி நீ பார்க்க முடியாததான என்னுடைய கடைசி கையெழுத்து இதுதான். என்னுடைய பிரேதத்தை பார்ப்பன தெருவுக்கு முன்னால் ஓடும் ஆரணி நதி மணலில் பார்க்கலாம்….

 

(ஒம்.) பி. சுப்பிரமணியன்.

 

ஜனநாயக அரசியல் வெளி, சிவில் சமூகம் என்பதே இல்லாதிருந்த காலமது. மக்களின் பிரச்சினைகளை முன்னெடுக்கும் வெகுமக்கள் அரசியல் இயக்கங்களே இல்லாதிருந்த காலம். 1916 இல் உருவான, ஜஸ்டிஸ் கட்சி என்று அறியப்பட்டிருந்த தென்னிந்திய நலவுரிமைச் சங்கம் தனது சென்னைக் கிளையை 1921 இல்தான் தொடங்கியிருந்தது. 1923 இல் அச்சென்னைக் கிளையின் மொத்த உறுப்பினர்கள் வெறும் 63 பேர் மட்டுமே. 1920 களின் இறுதிகளில் அன்றைய சென்னை மாகாணம் முழுக்கப் பரவியிருந்த அதன் உறுப்பினர்களின் எண்ணிக்கை 5000 பேர்கள் மட்டுமே. அவர்களில் 2000 பேர் சென்னை மற்றும் அதைச் சுற்றியிருந்த மாவட்டங்களை சேர்ந்தவர்கள்.

 
1924 ஆம் ஆண்டு வரை கட்சிக்கான அரசியல் அமைப்பு அறிக்கை என்பதே இல்லாமல்தான் தென்னிந்திய நலவுரிமைச் சங்கம் செயல்பட்டு வந்தது. கடும் நிர்ப்பந்தங்களுக்குப் பிறகு 1925 ஆம் ஆண்டு, அரசியல் அமைப்பு நகலறிக்கை உருவாக்கப்பட்டு கிடப்பில் போடப்பட்டது. 1928 ஆம் ஆண்டில் உள்ளூர் கட்சிக் கிளைகள் ஏதேனும் இருந்தால் தலைமையை தொடர்பு கொள்ளக்கோரி பத்திரிகைகளில் விளம்பரம் கொடுக்கும் நிலைமையில்தான் அக்கட்சியின் அமைப்புப் பலம் இருந்தது (பார்க்க: Christopher John Baker, The Politics of South India 1920 – 1937, CUP, 1976 பக். 63 – 71).

 
1921 இல் சென்னை மாகாணத்தின் மக்கள் தொகை ஏறத்தாழ 4 கோடி. 1920 ஆம் ஆண்டு இரட்டையாட்சி முறையில் 25 மாவட்ட தொகுதிகளில் நடைபெற்ற முதல் தேர்தலில் வாக்காளர்களின் எண்ணிக்கை 10 ¼ இலட்சம். கிராமப்புறங்களில் ரூ. 10 நில வரி கட்டியவர்களும் நகர்ப்புறங்களில் ரூ. 3 முனிசிபல் வரி கட்டியவர்களுமே வாக்காளர்கள். ஒரு தொகுதியில் வெற்றிபெறுவதற்கு மூன்று அல்லது நான்காயிரம் வாக்குகளை பெற்றாலே போதும் என்ற நிலை. முக்கிய கோயில்களின் நிர்வாகிகள், பேர்பெற்ற வழக்குரைஞர்கள், நிலச்சுவாந்தார்கள், வியாபாரிகள் இவர்களைச் சந்தித்து ஆதரவு திரட்டுவதே வாக்குச் சேகரிக்கும் நடைமுறை. வாக்குச் சேகரிப்பு பெரும்பாலும் மூடிய அறைகளுக்குள் கனவான்களைச் சந்தித்துப் பேசுவதாகவே இருந்தது. பொதுவான இந்நடைமுறைக்கு மாறாக, சென்னையில் ஜஸ்டிஸ் கட்சியின் ஆதரவாளர்கள், பொது இடங்களில் சுவரொட்டிகள் ஒட்டி விளம்பரம் செய்தார்கள் என்பதை கேள்விப்பட்டு கட்சியின் தலைவர் சர். பிட்டி தியாராயச் செட்டியார் துணுக்குற்றதாகவும் செய்தி உண்டு (மேற்குறித்த நூல், பக்: 35 – 37).

 
பார்ப்பனரல்லாதார் இயக்கமாக தோன்றிய ஜஸ்டிஸ் கட்சி என்று அறியப்பட்டிருந்த தென்னிந்திய நலவுரிமைச் சங்கம், தெளிவான அரசியல் கொள்கையை வரையறுத்துக் கொள்வது, பிரச்சார இயக்கங்களை வீச்சாக கொண்டு செல்வது, வலுவான வெகுமக்கள் அமைப்பாக உருப்பெறுவது என்ற எதிலும் நாட்டம் கொண்டிராத ஜமீந்தார்களின் கட்சியாகவே இருந்தது.
நவீன ஜனநாயக அரசியலின் மங்கலான நிழலாக மட்டுமே அரசியல் களம் உருவாகத் தொடங்கியிருந்த இக்காலப்பகுதியில்தான் 22 வயதே நிரம்பிய இளைஞர் சுப்பிரமணியன், ஒரு பார்ப்பன அதிகாரியால் ஏற்பட்ட தொல்லை தாளாமல், பார்ப்பனரல்லாதார் இயக்கத்தின் பிரச்சாரத்தின் தாக்கத்தில், ”பார்ப்பனரல்லாத உணர்ச்சி உடையவனாகவும் எனது பார்ப்பனரல்லாதார் சகோதர சகோதரிகள் பார்ப்பனக் கொடுமையிலிருந்து நீங்குவதற்காக”வும் தனது உயிரை மாய்த்துக்கொண்டார். நவீன அரசியல் களம் உருவாகத் தொடங்கியிருந்த ஆரம்பகாலத்தில் தமிழகம் கண்ட முதல் அரசியல் தன்னுயிர் கொடையாக அவரது மரணம் இருக்கலாம்.

 
பார்ப்பனரல்லாதாரின் அரசியல் விழிப்புணர்வுக்காகத் தனது உயிரை மாய்த்துக் கொண்ட இளைஞர் சுப்பிரமணியன் கேட்டுக் கொண்டபடி அவரது கடிதம் மெட்ராஸ் மெயில், ஜஸ்டிஸ் பத்திரிகைகளில் பிரசுரிக்கப்பட்டதா என்பது தெரியவில்லை. ஆனால், பெரியார் அவரது கடிதத்தைப் பிரசுரித்து மிகவும் உணர்ச்சிவயப்பட்டு அவரைச் “சுத்த வீரன்” என்று விதந்தோதியிருக்கிறார். விதந்தோதியதோடு நின்றுவிடவில்லை. அனைவருக்கான வாக்குரிமையும், அரசியல் உரிமைகளும், அடிப்படைச் சமத்துவமும்கூட இல்லாதிருந்த தமிழகத்தில், இந்தியத் துணைக்கண்டமே கண்டிராத வகையில், ஒரு மாபெரும் வெகுமக்கள் இயக்கத்தைக் கட்டி, அரசியல் விழிப்புணர்வையும் சமூக விழிப்புணர்வையும் ஊட்டினார்.

 
“குடி அரசு” இதழைப் பெரியார் தொடங்கியது 1925 ஆம் ஆண்டு மே மாதம். 1926 பிப்ரவரி மாதத்தில் 307 புதிய சந்தாதாரர்கள் சேர்ந்திருப்பதாக அறிவிக்கிறார். அதே ஆண்டு மே மாதம், இரண்டாம் ஆண்டுத் துவக்கத்தில் 2000 சந்தாதாரர்கள். அக்டோபர் மாதம் 4000 பிரதிகள் விற்பனை. 1927 இல் 4,500 சந்தாதாரர்கள். 1928 இல் 7,000 சந்தாதாரர்கள். 1928 ஆம் ஆண்டு இறுதியில் “குடி அரசு” 10,000 பிரதிகள் விற்பனையை எட்டுகிறது.

 
1928 மார்ச் மாதத்தில் “ரிவோல்ட்” ஆங்கிலப் பத்திரிகை துவங்க இருப்பதாக அறிவிக்கிறார். நவம்பர் மாதம் ஆரம்பித்தும் விடுகிறார். 1927 மார்ச் மாதம் ஜஸ்டிஸ் கட்சியார் தாம் நடத்தி வந்த “திராவிடன்” நாளிதழை பொறுப்பேற்று நடத்துமாறு கேட்டுக் கொண்டிருக்கிறார்கள் என்பதை தெரிவித்து வாசகர்கள் அபிப்பிராயத்தை கேட்கிறார். ஏற்று நடத்துமாறு 500 கடிதங்கள் வந்து சேர்ந்திருப்பதாக தெரிவிக்கிறார். 1928 ஏப்ரலில் “திராவிடன்” நாளிதழின் பொறுப்பை ஏற்றுக் கொண்டதாக அதிகாரப்பூர்வமாக அறிவிக்கிறார்.

 
1927 ஆம் ஆண்டுத் துவக்கத்தில் 5000 பிரதிநிதிகள் கூடிய பார்ப்பனரல்லாதார் மகாநாட்டை கூட்டி, ஜில்லாக்கள் தோறும் மாநாடுகள் நடத்தி இயக்கத்தை உள்ளூர் அளவில் உருவாக்க அறைக்கூவல் விடுக்கிறார். 1928 துவக்கத்தில் சைமன் பகிஷ்காரப் பிரச்சார இயக்கத்தின் பொருட்டு, ஒரு லட்சம் துண்டறிக்கைகள், 5000 சுவரொட்டிகள், 15 – 20 பொதுக்கூட்டங்கள் நடத்தப்பட்டதாக எழுதுகிறார்.

 
“குடி அரசு” இதழில், இந்து, சுதேசமித்திரன், மெட்ராஸ் மெயில் போன்ற பத்திரிகைகளின் புரட்டையும், காங்கிரசாரின் புரட்டையும் அம்பலப்படுத்துவதோடு நின்றுவிடவில்லை. பார்ப்பனரல்லாத தலைவர்களான திரு. வி. க, ஷண்முகம் செட்டியார், வரதராஜுலு நாயுடு ஆகியோருடனும் கடும் விவாதங்கள் நிகழ்த்துகிறார். பெரும் தமிழ் அறிஞராக அவரே மதித்த மறைமலை அடிகளுடனும் கூட கடுமையான விவாதங்களை நிகழ்த்தியிருக்கிறார் (“சுத்த சைவ ரத்த ஓட்டம் உள்ளவர்கள் இன்னமும் இவர்களைக் [சுயமரியாதை இயக்கத்தவர்களை] கொல்லாமல் இருக்கலாமா” என்று பல்லாவரத்தில் நடந்த ஒரு கூட்டத்தில் மறைமலை அடிகளார் பேசியதை ஒட்டிய விமர்சனமும் விவாதமும் சுவையானது). இந்தியத் துணைக் கண்டத்தில் நிகழ்ந்த ஒவ்வொரு நிகழ்வையும் பிரச்சினையையும் அலசி ஆராய்ந்து விமர்சித்து தெளிவுபடுத்தியிருக்கிறார். வரலாறு, இந்து சமயப் புரட்டு, காங்கிரசாரின் புரட்டு, பெண் விடுதலை, சாதி ஒழிப்பு என்று சமூகத்தின் சகலப் பிரச்சினைகளையும் எப்படி அணுகவேண்டும் என்ற பார்வையை – சட்டகத்தை விரித்துக் காட்டியிருக்கிறார்.

 
1928 ஆம் ஆண்டு, ஆகஸ்டு மாதம் “சுயமரியாதை போதனாமுறை பாடசாலை” என்ற பெயரில் அரசியல் பயிற்சி வகுப்புகளையும் நடத்துகிறார்.
மேலே கோடிட்டுக் காட்டியுள்ளதுபோல, இதழ்கள் வழியான கருத்துப் பிரச்சாரம், விவாதம், விமர்சனம், விளக்கப்படுத்தல், அரசியல் பயிற்சி வகுப்புகள் என்று இடைவிடாது அரசியல் கல்வி புகட்டியே கருத்தாழமும் தெளிவும் உடைய தொண்டர்களைக் கொண்ட சுயமரியாதை இயக்கத்தை பெரியார் கட்டமைத்தார்.

 
பத்து வருடங்களுக்கும் மேலாக அரசியல் கல்வி புகட்டி வளர்த்த அவரது இயக்கத்தாலேயே ராஜாஜி இரும்புக்கரம் கொண்டு திணித்த இந்தியை விரட்டியடிக்க முடிந்தது. 1948 வரை, தள்ளாத வயதிலும் வலுவான, கட்டுக்கோப்பான பெரும் இயக்கத்தை கட்டியிழுத்துச் செல்ல முடிந்தது. பெரியார் அரசியல் கல்வி புகட்டிக் கட்டமைத்த சுயமரியாதை இயக்கத்திலோ, திராவிடர் கழகத்திலோ உணர்ச்சி மேலீட்டால் இளைஞர்கள் தம்மை மாய்த்துக் கொண்டார்கள் என்ற வரலாறு இல்லை.

 
நீதி வேண்டித் தன்னுயிரை மாய்த்துக் கொள்ளல், நவீன அரசியல் உருப்பெறுவதற்கு முன்பான காலத்தில், தமிழகத்திலும் இந்தியத் துணைக்கண்டத்திலும் ஒடுக்கப்பட்ட எளிய மக்கள் கைக்கொண்ட எதிர்ப்பு வடிவங்களில் ஒன்று. எதிர்த்துப் போராட வழிவகை இல்லாத, பலம் மிக்க ஆதிக்க சாதியினருக்கு அல்லது அரசனுக்கு எதிராக, அவரது உற்றாரும் ஊராரும் கடவுளரும் இழித்துப் புறந்தள்ளும்படியான தீராப்பழியை சுமத்தும் நோக்கில் எளிய மக்கள் கைக்கொண்ட வடிவம். நவீன ஜனநாயக அரசியல் புலத்திலும் இவ்வெதிர்ப்பு வடிவத்தின் தொடர்ச்சி ஆங்காங்கே தெறிப்பதை அவ்வப்போது காண முடியும். பெரும் பலம் பொருந்திய சக்திகளை எதிர்த்துப் போராட வழிவகைகள் இல்லாத சூழ்நிலைகளிலேயே இவ்வடிவம் தோன்றுவதையும் அவதானிக்க முடியும்.

 
1927 இல், நவீன ஜனநாயக அரசியல் உருவாகிக் கொண்டிருந்த காலத்தில், தீர்க்கமான அரசியல் நோக்கையும் வாழ்க்கை பார்வையையும் தந்து வழிகாட்டக்கூடிய அரசியல் இயக்கம் எதுவும் இல்லாத நிலையில், பலவீனமான அரசியல் சூழலில்தான், தனது மரணம் அரசியல் விழிப்புணர்வை – புது மலர்ச்சியை உருவாக்கும் என்ற நம்பிக்கையுடன் தன்னுயிரை மாய்த்துக் கொண்டார் இளைஞர் சுப்பிரமணியன். அந்த இளைஞரின் உள்ளக்கிடக்கையை தனது தீர்க்கமான அரசியல் பார்வையினால் நடைமுறையில் சாத்தியமாக்கிக் காட்டினார் பெரியார்.

 
2009 இல் ஈழ இனப்படுகொலை நடந்து முடிந்திருந்த தருணத்தில், தமிழகத்தின் அரசியல் தேக்க நிலையை உடைத்து, புதிய அரசியல் அலை ஒன்று உருவாகத் தனது மரணம் வித்தாகும் என்ற உணர்வெழுச்சியில், அரசியல் தெளிவோடு தனது இன்னுயிரை ஈந்தவர் முத்துக்குமார்.

 
தமிழ்நாட்டைப் பீடித்திருக்கும் சாபமோ என்னவோ, அவரது தியாக நோக்கு நிறைவேறும் திசையில் ஒரு இம்மி கூட நாம் நகர்ந்திருப்பதாகத் தெரியவில்லை. தெளிந்த அரசியலையும், வரலாற்றுப் புரிதலையும், தத்துவ நோக்கையும், வாழ்க்கை பார்வையையும் வழிகாட்டுதலையும் தரும் புதிய இயக்கம் எதுவும் உருவாகவில்லை.

 
மாறாக, வாரத்திற்கு ஒரு அடையாளப் போராட்டம், தொலைக்காட்சி விவாதம், மாதத்திற்கு ஒரு ஆர்ப்பாட்டம் நடத்தும் இயக்கங்களும், “முப்பாட்டன் முருகனின் வரலாற்றைத் தெரிந்துகொள்ளத் திருவிளையாடல் படத்தை பார்” என்று சுவிசேஷக் கூட்டம் நடத்தும் இயக்கங்களும்தான் முளைத்திருக்கின்றன.

 
இந்நிலை தொடரும்வரை விக்னேஷ் போன்ற உணர்வெழுச்சிமிக்க இளைஞர்கள் நியாயமின்றித் தமது உயிரை மாய்த்துக்கொள்ளும் துயரமும் நிகழ்ந்துகொண்டுதான் இருக்கும்.

 

பின் குறிப்பாக:

 

விக்னேஷ் தனது உயிரை மாய்த்துக் கொண்டது, அரசியல் களப்பணி, அரசியல் கோட்பாடுகள், சமூக அரசியல் களத்தில் மாற்றங்களை நிகழ்த்தும் முறைகள் குறித்து இயக்கங்கள் எவ்வளவு தெளிவற்று இருக்கின்றன என்பதைச் சுட்டுவதாகவே இருக்கிறது. தமது அரசியல் தெளிவின்மையை உணராது, மக்கள் சுரணையற்று இருக்கிறார்கள் என்று பழிக்கும் திமிரும் சிலரிடத்தில் அதிகமாக வளர்ந்திருக்கிறது என்பதையும் அவரது மரணத்தை ஒட்டிய சில எதிர்வினைகள் காட்டுகின்றன. அவற்றுக்கான மறுப்பாகவும், பெரியாரின் இயக்கச் செயல்பாட்டில் இருந்து கற்றுக்கொள்ள வேண்டிய புள்ளிகளின் மீது கவனத்தைக் குவிக்கும் முகமாகவும் இக்குறிப்புகள்.

 

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

%d bloggers like this: